Eukuan patepiluiat Internet ka ishinikatet nitamishkuanan ka natshi uapatat nite ualkuiat (uanakuiat). Eukuane euauitakant enatapishtuakantau tshishe utshimaut eukuan ume ilnu assi mamu ka tat Mamuitun, Essipit, Mashteuiatsh mak Nutashkuan uauitakalit enatshishkuatau Utauau tshishe utshimau mak Upishtukuiau tshishe utshimau.

Shashish ka ut natapishtuakanit enishit tshishe utshimaut tshetshi tshishpeuatak ilnu utilniun. Eshpish tipatshimakan elut ishpish apatalu utishinikashun utaitun. Kie eshpish natapishtuakantau tshishe utshimaut takuan passe tshekuan upime tshi ashtakan, ilnut kie ka uapishit. Ane uet takuat tshi tutakan ualau Upishtukuiau tshishe utshimau etipeltak ute takuan tshi nukutakan shaputue mak nashpit apu ishinakuat tshetshi upime ashtakant ane Ilnu tiush ka tat ute Upishtukuiau assit kie mishue. Eukuane uet natapishtuakantau tshishe utshimaut nutshimiu assi tshetshi tipeltakanakau tshetshi eka un(i)takanakau at Upishtukuiau tshishe utshimau etipeltak ute.

N(a)tshent enishit tshishe utshimaut apu un(i)tat nelu eishi shuliatsheuatshet assi. Euk uil ilnu apu patshitanak utassi miam eishi pukushentamal Utauau tshishe utshimau, ilnu ntueltum tshetshi uitakalit tshetshi mashinaitikalit uil uetshit ilnu etipeltat nelu nutshimiu assi uil ushkat ka tat eka n(i)ta ka pashtinak utassi.

Uinishku pishum 31 etshishtuakan 2004 Ilnutshimaut mak n(i)tshent ka tshimalakanit tshishe utshimat mashinaitutishupan uatit enishtutatishut nelu etashten «Approche Commune» eukuane uatakan tapishkut ua utitikan neme milu nishtutatun. Kie ane etashtet mashinaikan apu itutakan ane nete ka ueueshtakan muk milu tshikauetashteu ane ua ishi ueueshitishunanut kie eka tshe ishinakuat tshetshi pikunakant tshishi milu nishtatunanut. Eukuan tshe apatit ane mishta mashinaikan tshetshi milu ueueshitishunanut (a)shit ka uapishit.

Kie nishtutuakanut ka uapishit nite pessish ilnit ka tat miam Shekutamit-Pekuakamit kie nete tetshe Mamit emamituneltamikuat nelu eishi ueueshitishunanulit. Uet tshi issishuanut tiush ilnu tepan tante eshku nukualu ka ishi ilniut nan(i)tan pet, eshku nitau (ntuu) eshku utaimun apashtau eshku nasham ka ishi ilniun umushum.

Tshipukushentimatunan tshetshi milu nishtutamek ane uet natapishtutshit tshishe utshimaut natshi uapatamek nite ualukuiat Internet ka ishinikatet.